वसंत ✒️धारा न्यूज नेटवर्क
पुसद : पुसद विधानसभा मतदारसंघात भारतीय जनता पक्षाच्या वतीने माजी आमदार श्री. निलय नाईक यांच्या नेतृत्वाखाली ‘स्नेह संवाद’ कार्यक्रमाचे आयोजन करण्यात आले. या कार्यक्रमाला भाजपचे नेते, पदाधिकारी, विविध आघाड्यांचे प्रमुख तसेच कार्यकर्ते मोठ्या संख्येने उपस्थित होते.
या स्नेह संवादाच्या माध्यमातून पक्षातील पदाधिकारी व कार्यकर्त्यांनी एकमेकांशी मनमोकळा संवाद साधत संघटनात्मक विषयांवर चर्चा केली. पक्षाची विचारधारा, संघटन अधिक मजबूत करण्यासाठी करावयाचे प्रयत्न तसेच आगामी काळात जनतेशी अधिक प्रभावीपणे संपर्क साधण्याबाबत यावेळी विचारविनिमय करण्यात आला.
कार्यक्रमात पुसद विधानसभा मतदारसंघातील भारतीय जनता पक्षाच्या विविध पदाधिकाऱ्यांसह कार्यकर्त्यांनी उत्स्फूर्त सहभाग नोंदविला. ग्रामीण व शहरी भागातील कार्यकर्त्यांची उपस्थिती विशेष लक्षवेधी ठरली. पक्षातील ज्येष्ठ नेते, पदाधिकारी आणि युवा कार्यकर्ते एकाच व्यासपीठावर आल्याने कार्यक्रमाला उत्साहाचे वातावरण निर्माण झाले होते.
माजी आमदार निलय नाईक यांच्या नेतृत्वाखाली आयोजित करण्यात आलेल्या या कार्यक्रमातून पक्षातील कार्यकर्त्यांमध्ये आपुलकीचे आणि संघटनात्मक ऐक्याचे दर्शन घडले. राजकीय कार्यक्रमासोबतच कार्यकर्त्यांमध्ये स्नेहाचे नाते अधिक दृढ करण्याचा प्रयत्न या उपक्रमातून करण्यात आला.
कार्यक्रमाच्या निमित्ताने उपस्थित सर्व नेते, पदाधिकारी व कार्यकर्त्यांनी स्नेहभोजनाचा आस्वाद घेतला. यावेळी विविध आघाड्यांचे प्रमुख, स्थानिक पदाधिकारी आणि मोठ्या संख्येने भाजप कार्यकर्ते उपस्थित होते.
पुसद विधानसभा मतदारसंघात भाजपची संघटनात्मक ताकद वाढविण्यासाठी कार्यकर्त्यांनी एकजुटीने काम करण्याचा निर्धार या स्नेह संवादातून व्यक्त केला. त्यामुळे हा कार्यक्रम केवळ स्नेहमेळावा न ठरता पक्षातील कार्यकर्त्यांना नव्या उत्साहाने काम करण्याची प्रेरणा देणारा ठरला.
