🐂 राजना येथे पोळा सण उत्साहात साजरा

राजना, ता. पुसद : महाराष्ट्राच्या ग्रामीण संस्कृतीचे आणि शेतकरी जीवनाचे प्रतीक असलेला पोळा सण राजना गावात मोठ्या उत्साहात व पारंपरिक पद्धतीने साजरा करण्यात आला. वर्षभर शेतात राबणाऱ्या बैलांप्रती कृतज्ञता व्यक्त करण्यासाठी शेतकरी बांधवांनी आपल्या सर्जा-राजाची मनोभावे पूजा केली.
पोळ्याच्या निमित्ताने सकाळपासूनच गावातील शेतकरी आपल्या बैलांना नदी, विहीर किंवा पाण्याच्या ठिकाणी नेऊन स्वच्छ आंघोळ घातली. त्यानंतर बैलांच्या शिंगांना आकर्षक रंग लावून, गळ्यात घंटा व विविध सजावटीचे साहित्य बांधून त्यांना सजविण्यात आले. बैलांच्या पाठीवर सुंदर नक्षीकाम केलेले झूल, गळ्यात धुंगरांच्या माळा तसेच विविध रंगांची सजावट करण्यात आली होती.
दिवसभर सजविलेल्या बैलांमुळे राजना गावातील वातावरणात उत्साहाचे आणि आनंदाचे चित्र पाहायला मिळाले. सायंकाळी गावातून सजविलेल्या बैलांची मिरवणूक काढण्यात आली. वाजत-गाजत आणि ढोल-ताशांच्या गजरात बैलांची मिरवणूक निघाल्याने गावातील वातावरण भक्तिमय व उत्साहपूर्ण झाले. ग्रामस्थांनी बैलांची पूजा करून त्यांना पुरणपोळी, गोडधोड व नैवेद्य अर्पण केला.
शेतकऱ्याच्या जीवनात बैलांचे अनन्यसाधारण महत्त्व आहे. शेतीच्या कामात वर्षभर शेतकऱ्याला साथ देणाऱ्या या मुक्या जीवांप्रती कृतज्ञता व्यक्त करण्याचा पोळा हा एक महत्त्वाचा सण आहे. राजना येथील पोळा उत्सवातून ग्रामीण संस्कृती, परंपरा आणि शेतकरी-बैल यांच्यातील जिव्हाळ्याचे नाते पुन्हा एकदा अधोरेखित झाले.

Author: Vasant Dhara News